Plantun de Prouvènço

Pèr coumpara dos planto d'encò nostre

Rumex sanguineus & Rosa pouzini

Rumex sanguineus

Polygonaceae

Nom en français : Oseille sanguine.

Descripcioun :
Aquesto paciènci, pulèu raro au nostre, trachis dins li fourèst fresco, li gaudre e proche d'aigo. Li fueio en cor à la baso, amé un pecou, soun pas acido. Se recounèis subretout à si valvo de fru entiero, pu longo que larjo emé soulamen un couissin desveloupa (au contro de Rumex conglomeratus que n'a tres). Coumpara emé la paciènci-agroumelado, proun coumuno que ié sèmblo proun.

Usanço :
Es estado cultivado en Éuroupo coume liume. S'adoubo coume d'espinarc, pamens fau chanja mai d'un cop l'aigo de couissoun. Ramentan que faudrié pas trop en manja malodi l'acide óussali.

Port : Erbo
Taio : 30 à 90 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Rumex
Famiho : Polygonaceae

Ordre : Caryophyllales

Coulour de la flour : Verdo
Petalo : 3
Ø (o loungour) flour : Pancaro entresigna
Flourido : Printèms - Estiéu

Sòu : Si (Ca)
Autour basso e auto : 0 à 1200 m
Aparado : Noun
Mai à avoust

Liò : Ribiero - Fourèst fresco - Gaudre
Estànci : Termoumediterran à Coulinen
Couroulougi : Éurasiatico
Ref. sc. : Rumex sanguineus L., 1753

Agufié(-de-Pouzin)

Rosa pouzini

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier de Pouzin.

Descripcioun :
Aquel agufié, Rosa pouzinii, trachis dins li relarg secarous sus cauquié. Es un aubret pas proun aut que se recounèis bèn à si ramo e fueio rouginasso sus lou bord e pulèu lusènto dessubre. Li fuioun, à dènt doublo e prefoundo, soun sènso péu e porton de glando roujo à óudour de resino. Li flour soun roso e li sepalo soun proun descoupado.

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.